【娱圈新聞】車婉婉死過翻生自揭瘡疤3度啜泣 含淚感謝大恩人曾志偉從谷底拯救

車婉婉死過翻生自揭瘡疤3度啜泣 含淚感謝大恩人曾志偉從谷底拯救

50歲車婉婉出身自92年第11屆《新秀》，近年憑主持兩輯《中年好聲音》鹹魚大翻生。入行32年，婉婉自稱一直好霉，講到辛酸史更悲從中來，3度落淚。向來強勢的她自爆2007年母親車綺芬離世後，因為爛聲唱唔到歌，亡母的心血酒樓又管理不善，欠落大堆街數，自己積蓄亦見底，人生跌落谷低！幸得大恩人曾志偉出手營救，畀機會她做《中音》主持，展開奇妙的人生下半場。

車婉婉主持《中音》後知名度大增，去年仲客串TVB台慶劇《新聞女王》，演霸氣前台柱主播「華姐」，贏盡好評，今年又首度開個人音樂會及跟「中一生」有登台機會。她坦言家搵錢升幅係百份百，是入行以來最順境的時間。

車婉婉能夠「鹹魚翻生」，全靠曾志偉欽點她做《中年好聲音》主持：「我17歲出道就跟住佢去做扶貧及幫明星足球隊籌款，記得有日志偉打嚟問『鯇魚(花名)，你好多嘢拍咩？』我答麻麻啦，佢就秒回『咁得喇，有個綜藝節目搵你做，聽日返去同你度期。』完成兩季節目後傳短訊多謝佢，做人要飲水思源。」婉婉講到眼有淚光：「處女主持綜藝節目，有包袱及壓力，第一日錄影志偉都有嚟監場，我都驚做得唔好下季冇份嘛。」

Sammi介紹醫生救聲帶
1992年入行的車婉婉坦言一直好霉：「你估拍劇好多錢咩？電影幾年先拍得一部，每次得嗰3、5組戲，條數根本計唔到，係呢？連自己都唔知呢32年係點過？阿媽在生咪用阿媽啲錢；阿媽唔喺度唯有搵少少錢，見一日行一日囉。』」婉婉自細由阿媽帶大，媽媽離世後冇晒方向，甚至迷失到陷入抑鬱狀態，終日掛住食煙飲酒，聲都爛埋唱唔到歌，不幸中大幸獲另一位恩人俞琤收留，安排她拍住林曉峰主持商台節目，一做7年，總算有穩定收入：「但唱歌係我最愛，用嚟抒發情感，當時真係覺得唱歌放棄咗我，上天叫我要收檔喇，就算gathering時，朋友拎枝咪埋嚟我都好抗拒咁推開，真係好唔開心，打後10幾年再冇人搵我做唱歌show，開演唱會更加係發夢！鄭秀文知我好唔開心，介紹一位喺美國中部嘅專科名醫畀我，因為醫藥費太貴，加上冇人冇物，最後睇港大一位教授，中西合璧治療，近年又唱得返歌。」

做藝人真係咪做生意
講到人生中最難受的事，婉婉坦言是守唔住亡母生前經營的酒樓，於2019年的母親節倒閉，她哭著說：「呢間嘢係媽媽留畀我，佢走咗我要勉強接手，但飲食生意真係好難做，唔係一個普通人識得做，真係冇晒辦法，嗰幾年嘅利潤點都追唔到要交幾百萬租金，我喺疫情前忍痛結業算係執身彩(蝕咗幾多？)唔好講！唔識計！唔想計…仲因為太單純信錯人搞到一身蟻，所有錢冇晒，從呢件事體會到，藝人係唔應該做生意。」當時婉婉一無所有，兒子BBQ又出世，只能開源節流養家及主動搲撈：「我覺得自己講嘢OK，好想畀人睇到我做綜藝主持係得嘅，試過『打大佬』敲綜藝組高層嘅門話好想做，但都無功而回。」自己冇嘢做，老公於疫情期間又教唔到游水。「我好抑鬱，要打多份工做理財顧問增加收入，做人真係好困難，所以見到參賽者喺舞台上分享人生經歷，我會用心去聽及用感性角度去了解，特別係屋企人離世。感恩喺變態路程有經理人陪伴，喺佢身上學到好多嘢。」語畢，婉婉又再落淚。另外，對於向展鵬跟她道歉，婉婉笑說：「又唔使道歉，自己真係寸過佢會心虛，我點會窒我啲『屋企人』啫？唔緊要，下次一齊飲過。」

葉子楣58歲生日星光熠熠 變身神奇女俠展現導彈身材

90年代性感女星葉子楣在1992年息影後一度神隱，直到今年終於頻頻現身，甚至宣布有意復出。昨日（10日）她廣邀60位圈中好友出席其58歲生日派對，更換上神奇女俠裝扮，展現導彈級身材，與一眾好友狂歡。

資深傳媒人汪曼玲上載場內多張合照，嘉賓陣容盛大如陳欣健、黃百鳴、陳德森、羅蘭、尹光、黃錦燊、樂易玲、崔建邦、李思捷、關寶慧、黃玉郎、吳麗珠、鄧英敏、文雋、陳友、楊仲恩及魏秋樺等，還有吳君如媽媽冬嬸與囝囝吳君祥，古天樂母李綺雯與及佘詩曼媽媽Lily（佘媽）都有現身，場面非常熱鬧。相中所見，主角葉子楣以神奇女俠造型示人，戴上金色長曲假髮，美好身材表露無遺，雖然其他賓客未有配合，但就令壽星女更加搶鏡。

葉子楣息影後曾與好友斷聯絡

一眾好友都輪流上台獻唱，當然少不了葉子楣在台上高歌，她更拿起結他相當有型，好友就拿起燈牌支持，甚至羅蘭姐都罕有開金口，手持利是唱《漫步人生路》。席間，葉子楣收到鮮花和兩個蛋糕，其中一個就是神奇女俠的造型，她之後又換上另一套銀色低胸短裙，展示得天獨厚的好身材。19歲時報讀亞視藝員訓練班出道的葉子楣，在亞視期間拍了輯泳照，被當時嘉禾集團前任董事會副主席鄒定歐看中，葉子楣轉戰影圈後拍了多套三級片而爆紅，直至1992年息影。葉子楣早前受訪時透露有一時間與昔日圈中好友近乎斷絕聯絡，連電話號亦刪去，大約兩年前在生日聚會與黃百鳴及陳欣健等再次見面，開心感覺重現，才再次活躍。