【娱圈新聞】陳玉蓮近照曝光 64歲生日獲長情fans慶祝 逆齡生長仙氣大爆發
陳玉蓮近照曝光 64歲生日獲長情fans慶祝 逆齡生長仙氣大爆發
被譽為最美小龍女的陳玉蓮自從在1993年息影後，已經神隱了一段日子，雖然在2007年復出，參與社區義工的工作及有關活動，與及拍TVB劇集及電影，不過瞬間又絕迹幕前，選擇低調地生活，周一（25日）是陳玉蓮的64歲生日，一班長情的fans為陳玉蓮慶祝，久違了的陳玉蓮狀態其佳，與實際年齡完全有出入！
近年深居簡出的陳玉蓮，已經未有踏足幕前工作，幸好間中亦有參與圈中好友的聚會，總算略知陳玉蓮的近況！周一（25日）是陳玉蓮的64歲生日，今年生日陳玉蓮與一班伴隨多年的fans慶祝，事後將陳玉蓮的近照上載到社交平台並說：「因為知道大家都非常掛念蓮妹，所以有新的美圖，當然要第一時間和各位fans分享。今天3月25日，是大家的女神蓮妹生日，再次祝福她身體健康，笑口常開，修行進步。 希望各位 fans 都喜歡蓮妹最新的照片。」相中所見， 一頭短髮的陳玉蓮容光煥發，外貌依然仙氣滿瀉，與實際年齡完全有出入，果然是得天獨厚，保養得宜！
陳玉蓮是演金庸劇最多的女主角
今年是查良鏞博士（金庸）百歲誕辰紀念，原來陳玉蓮是演金庸劇最多的女主角，她曾在1978年在《倚天屠龍記》 飾演小昭、1982年《天龍八部》飾演王語嫣、1983年《神鵰俠侶》飾演膽小龍女，與及1988年在《射鵰英雄傳》飾演黃蓉。當中在《神鵰俠侶》飾演的姑姑小龍女，因陳玉蓮外貌出塵脫俗兼有不食人間煙火的氣質，被譽為是「最美的小龍女」，當時更有傳劉德華暗戀陳玉蓮，但被女方拒絕，其後劉德華亦多次公開讚賞陳玉蓮，稱是他心目最完美「姑姑」。
陳玉蓮曾與周潤發拍電影《大亨》譜愛火
陳玉蓮的感情生活在當年相當轟動，她與周潤發因拍攝電影《大亨》而譜出愛火，周潤發更加是陳玉蓮的初戀，雖然兩人拍拖以來受外界不少壓力，但陳玉蓮依然堅持寧要愛情，可惜最後因工作關係聚少離多，最終相戀5年後分手收場，其後有報導傳周潤發愛得死去活來，走不出情傷，在家中疑飲用清潔劑自殺。陳玉蓮亦曾表示兩人分手之間並不存在任何壓力與第三者，只因兩人同為演員工作忙碌，根本沒有時間相處，所以兩人最後選擇分手也是無可避免之結果。後來陳玉蓮在沈殿霞的介紹下，認識了在美國賭場大亨陳超武，兩人在1984年結婚並在美國定居，可惜這段婚姻只維持短短8年便結束，陳玉蓮曾在訪問中表示婚後狀態不像已婚，以往拍劇所賺取的金錢也足夠她經濟獨立，她也說自己婚後沒有依靠任何人：「結了婚原來好像沒結婚，別人結婚有丈夫養，為何沒有人養我？」至今仍是單身的陳玉蓮，篤信佛教的她選擇帶髮修行，多年來熱心公益。
馬德鐘被嘲「膠」樣大反擊：眼耳口鼻郁到喎 55歲變回19歲磅數公開刻苦Keep Fit方法
55歲馬德鐘（馬神）在《再見·枕邊人》，跟「前妻」41歲黃智雯和「未婚妻」33歲張曦雯大搞3角關係。因為Keep得好拍檔越來越後生，重提年前開始茹素急瘦現皺紋，被指「膠」樣疑整容，馬神即反問：「點樣膠得嚟，笑起上嚟又多皺紋呢？！」。
馬神跟黃智雯和張曦雯再合作，覺得她們有很大變化，先講2008年《東山飄雨西關晴》合作的黃智雯， 「《飛虎》（2012年）時佢做我手下，依家演技上成熟咗好多。」第3度合作的張曦雯進步更大，「我睇劇本時，佢個角色，咦！都幾辣喎！要放得開演衰嘢，佢又完全冇包袱，演繹上已經好成熟。」
操強肌肉唔怕跌
幾年前開始茹素急瘦的馬神，現在精神狀態更勝從前，連朋友都笑問他，為何女拍檔越來越後生？他認為秘訣除了食植物性食物外，最重要夠自律，「生活上夠健康，不嬲唔食煙，依家完全滴酒不沾，每日唔係開工好密都會做運動，男仔又會着數啲，襯唔同年齡嘅人，又好似都可以。」對於急瘦變「膠」被指整容，他不怒反笑，「都覺得幾好笑，有啲人話『你好膠』，有啲人又話『點解你笑起上嚟咁多皺紋』，點樣膠得嚟，笑起上嚟多皺紋呢？！嗰時可能瘦，大家會覺得個樣有啲分別，我又唔係好覺，咦！依家大家又覺得『佢啲眼耳口鼻又郁到喎』哈哈！咁就OK！」
身高183cm的馬神，多年來磅數相差甚大，「依家185磅，係19歲時嘅磅數，食素之前差唔多200幾磅，食素就即刻跌咗落嚟，變返18、19歲嘅磅數，依家啲肌肉係冇咁大，變咗好似瘦啲、削啲，有時間做返運動啲肌肉脹返啲，個人脹返，雖然磅數差唔多，但體質唔一樣。」雖然已重回年輕時體重，但他依然未滿意，「仲可以好啲，再fit啲，尤其年齡越嚟越大，肌肉量會流失好難keep，冇肌肉啲骨頭支撐得唔好，跌一跌會好易有事。」
兩公婆唔願出街
劇中馬神跟枕邊人關係麻麻，現實就跟太太張筱蘭，拍拖連結婚37年來一直恩愛，問到相處之道，「開心嘅，我哋好多嘢傾，咩都可以傾。」他又認為已年過半百，會更加珍惜身邊一切，所以跟太太會如孖公仔一樣出入，「冇乜時候唔係一齊，珍惜多啲時間同屋企人相處，我太太唔忙時，我去邊做嘢都會同我一齊，好少plan旅行，鍾意留喺屋企，我哋工作去唔同地方，工作之餘四圍睇吓。」他又指太太處理任何事都出色，但都會分工合作家中大小事，「買啲乜嘢，點樣整營養會夠啲，佢係專家嚟，日常嘢佢好強，屋企漏水或者燈壞，啲車有問題就我嘅，大家好易配合到。」
去年變回自由身的馬神，一直有指他計劃開個人工作室，他暫未揸定主意，更不排除簽新公司，「我又未諗，內地、香港都有工作，外地登台都有，變咗都忙咪做住先囉！有公司大家傾到個方向好夾嘅咪再諗，方向未必啱嘅，簽咗都冇乜作用。」他認為現階段最重要做得舒服，希望工作和生活取得平均，「好享受工作過程，我覺得人生已經得到一啲嘢，我又冇話好大野心，工作需要平衡，工作之餘要有自己生活，呢個先係人生。」馬神又稱舊時工作是80%，根本不知自己做緊乜，「去太多唔同地方做嘢，同太多唔同嘅人合作，合作完可能好快忘記，好多風景你走過咗，係咪睇到嗰啲風景呢？！未必，依家要經過，要睇到啲嘢。」他更有打算做製作人，拍攝綜藝節目，「想拍啲舊嘅社會同新社會建築物嘅轉變，我鍾意呢啲嘢。」