【娱圈新聞】79歲馮素波兩度被批只活到73歲 年初七拍戲做一事成功度過？
79歲馮素波兩度被批只活到73歲 年初七拍戲做一事成功度過？
「貼地嫲嫲」馮素波（波姐）今年便80歲，近年活躍於社交平台，與網民分享生活日常，深受網民喜愛。馮素波近日接受網上靈異節目《恐怖在線》訪問，與潘紹聰大談三度搬屋遇靈異事，以及兩度被相士狠批活不過73歲的經歷。
馮素波在節目中表自己不迷信，但卻相信風水，更有吸靈異體質，因三度搬屋都遇上遇靈異事，有兩次還疑似見到父母顯靈：「因為我識得個朋友睇風水，我搬新屋，呢個朋友就叫要裝香嘅嘢、神位唔好擺喺呢幅牆，當我要擺傢俬最好擺就係嗰幅牆，就唔到。我心諗你又冇解釋俾我知做咩唔好擺，咁我咪將個位擺正喺嗰度，我只不過擺個香爐喺嗰度，我又冇擺神位，只係擺咗我老竇張相喺嗰度，一擺我老竇張相就仆咗落個香爐度。」馮素波之後去瞓覺，聽到老公返家時，她疑遭「鬼壓床」：「郁唔到，得有人拉我張被。」不過她估計是已故的爸爸馮峰與她開玩笑。
馮素波遇見靈異事行運
馮素波之後再搬屋，她笑說今次遇到媽媽：「我見到有兩個紙紮公仔企喺我床尾，想拉我走，我見到媽媽喺牆，叫我念經啦！到依家我未見到我阿媽，廿年冇見。」馮素波表示因為年紀大，所以租屋每次只能簽兩、三年租約，因為頻頻要搬屋，她說：「到另外一次又要搬屋，我眼尾望到間房有個黑色衫嘅女人，冇樣，唉！又擺錯位。我唔敢同我老公講。」馮素波笑言自己百無禁忌，而且自從遇見靈異事後，便多了不少工作：「間屋我三年未瞓超過兩個半鐘喺張床。」
談到兩度被相士狠批活不過73歲，已經79歲的馮素波看得淡然：「嗰年我老公過身，就係要拍戲，要拍陳友嗰套《兄弟班》，正月叫我上去拍又唔講拍乜，結果年初七上去，我做阿B（鍾鎮濤）個馬姐，阿B送我返鄉下，我押住兩副棺材。嗰年我73歲。」馮素波指對年自己只是30幾歲，被相士批只餘約40年命，當時未有特別注意，她指相士當時說：「你做幾多好事都冇用，你73歲一定死。佢講得好實，嗰陣我30幾歲睇，30幾歲嘅時候點會驚吖！」
馮素波坦然面對死亡
馮素波又提到有一次胞妹叫她去檢查心臟，原來是妹夫余子明叫太太通知她，表示是師傅要求，馮素波便去睇醫生，檢查結果一切正常。馮素波到58歲時再去見師傅，同樣被指活不過73歲。馮素波輕鬆笑說：「我準備73歲死㗎！嗰年我仲開演唱會，外國啲親戚全部返嚟，永別會，我諗住睇吓幾時死，點知唔係我死，係我老公死。我而家80歲，又玩多七年。」馮素波相隔多年後，覺得是一個笑話，坦然面對死亡。
鄧兆尊鄧翠玉鄧兆榮親撐曾慧開騷紀念先父 慈善伶王新馬師曾逝世27周年
慈善伶王新馬師曾（祥哥）於1997年4月21日病逝， 2024年是祥哥逝世27周年，徒弟曾慧為圓心願，決定邀請同門師兄弟彭熾權、黎駿聲、麥嘉、聯同徒弟司馬祥和劉麗等，假新光戲院大劇院演出，於4月22日晚舉行《伶王桃李念師恩》演唱會；4月23日晚則演出新馬師曾名劇《薛平貴與王寶釧》。
曾慧是祥哥1994年收為徒，而今次参與演出者，全是「新馬」派嫡傳弟子和學生。彭熾權是祥哥1984年正式收為徒，他覺得好難得，是上天關照。黎駿聲於1993年3月初，香港電台與廣東電台合辦《萬千希望在人間》節目與祥哥初逢，得紅線女引薦，正式拜入祥哥門下，祥哥更親自幫他改藝名「小新馬」。麥嘉讀中學時流行唱英文歌，偶爾有一次，他聽到祥哥唱《胡不歸》之「哭墳」，感覺這人「點會咁犀利」，不似唱歌似講說話感情充沛。後來父親告訴他歌者名為新馬師曾，麥嘉開始喜歡聽他的歌，祥哥的歌令他對粵劇另眼相看，雖未斟拜師茶，但他一直稱呼祥哥為師父，祥哥更親自教唱歌有穿透力的秘訣。
鄧家兄妹合唱《萬惡淫為首》
曾慧拜師後，每次來港祥哥、祥嫂都讓她住在家中，跟鄧兆尊、鄧翠玉和鄧兆榮相當熟絡，曾慧笑言﹕「我們4四個人當時攻守同盟，晚上什麼人照顧師父，什麼人要出外，要口供一致，我們一定互相配合。我很感謝他們當我姊姊一樣，大家猶如一家人。」曾慧親自邀請鄧兆尊、鄧翠玉和鄧兆榮出席演唱會，他們已多年沒結伴出席公開活動，4月22日晚罕見地一同出席，而且坐足全場，可見3兄妹非常重視曾慧為父親籌辦紀念騷。兆尊表示﹕「很多謝慧姐帶了一班徒子徒孫來港，為紀念父親籌辦這麼大型的演出，也很多謝來自世界各地、省港澳的觀眾，冒着風雨仍來觀賞今次表演。」
原來，祥哥最後一次公開表演，地點就在新光戲院，3兄妹在後台看着化妝間，憶起昔日父親當年在什麼位置化粧，什麼地方穿戲服，感到很親切。翠玉記得，就在祥哥於新光戲院作最後演出的當晚，因她誤觸戲班禁忌，女人不能坐上神箱面，還給戲班叔父喝罵，受了委屈的翠玉把事情告之祥哥，祥哥大怒，把責罵翠玉的工作人員大罵一頓﹕「你再鬧我個女，我唔出場！」兆尊馬上取笑翠玉﹕「所以寶貝女即係寶貝女！」父親逝世後，兆尊已較少聽回父親的名曲，這一晚重聽這些名曲，兆尊很感觸:「徒子徒孫們唱得真好，希望『新馬』派藝術能一直傳承下去，可以發揚光大。」完場前，全體演出者聯同兆尊、翠玉、兆榮合唱祥哥首本名曲《萬惡淫為首》，現場氣氛非常溫馨。
馮盈盈狂讀書追求精神滿足：我變咗喇 告別拜金女 兩年內唔會拍拖
馮盈盈自2016年當選港姐冠軍後已是「話題女王」，是非不絕，更被標籤為拜金女，前年有指衰推劇被掟入雪櫃，直至拍《逆天奇案2》解凍。盈盈冇浪費人生，趁冇工開重回港大修讀營銷學碩士，更重新搵到定位，變身人生導師。對於被指讀書洗底，刻意搣甩拜金形象？強調兩年內唔會拍拖的她巧妙回應：「我會拜呢方面嘅金，就係追求書中嘅黃金屋，家我着重精神滿足！」
在《逆天奇案2》中，馮盈盈不再是陳展鵬及林夏薇的「第3者」，跟打救她的暖男男友高鈞賢變甜蜜CP，上演公主抱、咀嘴、小鳥依人等冧爆場口，連女導演睇完playback都大讚兩人有火花。在盈盈眼中的高鈞賢似大哥哥一樣照顧身邊人，對於兩人結伴逛深圳超市被野生捕獲，女方更一臉冧冧豬對住男方，盈盈即笑說：「係咪讚我笑容甜美，觀眾感受到我哋好有CP感呀？」
搵泰臣惡補演技
盈盈在劇中要演繹生死戀感覺，內心戲相當複雜，喊戲連場，情緒表達亦有唔同層次，雖然戲份不及上一集，但發揮好大：「為拍呢套劇，我請咗泰臣做戲劇老師，將所有場口預演一次，做定功課先去『考試』。」之前盈盈孭飛的《妳不是她》曾被狠批演技，問到是否雪藏過後變得更進取，懂得珍惜機會？她打官腔避談：「機會一直都珍惜，只係一直尋求方法做好啲，尤其唔再係新人，觀眾包容程度冇咁大，要拉高標準尺度，追上觀眾步伐……學海無涯，自知有好大進步空間，希望觀眾見證我能突飛猛進，感受到劇中人比第一集變得成熟及沉穩。」
家係真正自己
提到停演兩年，可有得着及啟發？盈盈幾乎被考起，諗咗一陣才答：「都感恩中間有段時間畀我沉澱，原來演戲要同角色有共鳴，如果劇接劇就未必感受到生活，永遠去唔到另一個level。」盈盈是2016年學霸港姐冠軍，當選後即受公司力捧，就算主持節目《後生仔傾下計》因言論大膽出位被封「性博士」，2018年也能極速上位奪得「女飛躍」獎，後來因跟江嘉敏去過富豪船P反晒面，被指係是非拜金女，形象急轉差。不過，解凍後嘅盈盈脫胎換骨，唔止戒嘈，更加添文青書卷味，似乎刻意修正負面形象。對此，她大笑道：「唔係刻意嘅，係自然地做返真正嘅自己，咁樣最舒服自在，以前為咗主持綜藝節目要全情投入氣氛，要開心活潑啲怕交唔到貨，家展露大家未見過嘅一面，其實識我嘅人會嫌我靜。」追問自我增值後，是否不再拜金？她答得巧妙：「我會拜呢方面嘅金，追求書中嘅黃金屋，家我着重精神滿足多啲！去學習唔同知識先係最無價嘅財富。我打算未來兩年，就算遇上適合對象都唔會考慮拍拖，因為要專心我嘅工作及學習，雖然已完成碩士學位，但啱啱又收到哈佛大學嘅商業管理網上課程，希望透過唔同嘅專業考試豐富唔同知識範疇，會拍片將學習過程分享畀大家。」
讀書先有安全感
盈盈不斷讀書但否認鋪路轉行，強調跟公司仲有一段時間嘅合約，只不過讀書可以平衡心理壓力，而且近年經歷亦令她有感而發：「可能人大咗，出嚟做咗幾年嘢，體會到唔係一分耕耘一分收穫，有啲嘢自己好難控制到，會有不安全感，讀書反而帶出安全感，因為有幾多努力自然得到有幾多分，呢個會畀到自己努力嘅目標。」她又補充指自己心態唔同咗，更糾正一啲錯誤觀念：「女人最大魅力唔係來自香水及外表，吸引力喺修為及內涵方面，所以家會追求精神滿足（唔再追求名牌包包？）係呀，哈！我變咗喇。入行8年都希望大家睇到我嘅成長，係會成熟嘅。」