2022年英國駕駛新規例

踏入2022 年，英國陸續有幾項交通及駕駛有關嘅新法例、指引出爐，所有駕車人士要留意。

1. 駕車時嚴禁使用手提電話

雖然英國早喺 2003 年已經立法禁止司機行車時攞住手機打電話、發短訊、睇導航，甚至停燈位及車龍中慢駛時都唔得，不過仍有不少司機違規，新一年開始法例再訂明禁止用手機拍照及影片、揀歌、打機，以杜絕漏洞，違者將被罰 £200 及扣六分。駕駛時司機只可以用「免提」（hands-free）方式使用已經固定在支架嘅裝置，包括手機及衞星導航設備，不過如果剛巧發生交通意外，司機仍有機會因當時未有專注操縱車輛而被罰。

千祈唔好以為冇咁啱會俾警察捉到，警方原來已經完成試用一套自動識別系統，幫手捉用緊手機嘅司機，喺某條高速公路試驗咗差不多一年，系統利用高清智能相機配合 AI 程式，六個月之內準確辨認到一萬五千個違規個案，就算你架車開到 185 mph，都無所遁形。

2. 杜絕使用「紅油」及生物燃料

同香港早年一樣，由於汽車燃料價格上升，有職業司機將原本用喺起重機、打椿機、船舶、農業設備之類嘅工業用柴油（紅油），注入貨車及汽車用。但由四月一日開始，就會完全禁止一般道路上車輛用紅油，同埋其他享有稅務優惠嘅生物燃料。

3. 設立新 Clean Air Zones

在 Greater London 以外，繼早前新增嘅 Bath、Birmingham、Portsmouth，嚟緊會設立 Clean Air Zones 嘅城市有 Greater Manchester（五月三十日）、Newcastle-upon-Tyne（七月）、Bradford（首季）、Bristol（年中）。由於各地將會按汽車類型實施限制及收費，出入以上城市嘅朋友要留意當地消息。

4. 新車強制安裝限速器

為改善道路安全，英國雖然脫咗歐，仍然喺七月六日同歐盟國家一致，同日起強制所有發售嘅新車必須裝上限速器（speed limiter），即係無論你架新車係超級跑車定係細車，駕駛時架車會自動限制最高時速喺某個數（大部份車廠將設定 112 mph），雖然司機係可以隨時關上限速器，繼續加速，但當車速超過該預定上限，標板就會有警告燈號或聲響持續提示，要煩到你減速為止，都幾絕吓。

5. 所有新建築物必須有電動車充電埠

呢個新例係意料之內，因為英國已經講明 2030 年後只有電動車新車發售，而加都應該開始谷吓多啲人轉用，四圍有足夠充電埠真係其中一個重要誘因。

6. Highway Code 引入有關道路使用者新概念

從一月二十九日起，英國 Highway Code 中會有新 Rule H1、H2 、H2，清晰確立一套道路使用者層級架構（Hierarchy of Road Users），簡單而言將所有道路使用者按交通意外中可能承受嘅風險排序，最有機會受傷係行人，特別係兒童、老人家、傷殘人士，然後到踩單車嘅、騎馬嘅、揸電單車嘅，如此類推，在架構入面越後嘅人士，就越有責任照顧較前嘅道路使用者，減少佢哋面對嘅風險，所以大貨車應該讓路俾私家車，私家車要讓電單車，電單車要讓單車，單車要讓行人 ……（係咪有啲似鬥獸棋）。新條文強調並非只係想將道路使用者分優先次序，而希望可以令各類別使用者互相尊重，培養一套顧及他人同埋安全運用道路嘅文化。

延伸資料：
https://www.gov.uk/government/news/any-use-of-hand-held-mobile-phone-while-driving-to-become-illegal

https://www.gov.uk/government/consultations/review-of-the-highway-code-to-improve-road-safety-for-cyclists-pedestrians-and-horse-riders/summary-of-the-consultation-proposals-on-a-review-of-the-highway-code