食安中心指清洗蛋殼非必要 反致微生物滲入蛋內

食物安全中心在facebook專頁指,一般而言,雞蛋是無需清洗。除非市民發現蛋殼被禽鳥的糞便污染,就要用水清洗;洗完之後,還要即刻將雞蛋煮熟。

中心解釋,一般情況下因為洗濕雞蛋可能會有利蛋殼上的微生物滲入蛋內,而殘留在蛋殼的水,亦有機會令上面的細菌繼續生存。一旦清洗得不妥當,亦可能會破壞雞蛋的表層膜,削弱保護功能。

中心指,市面上出售的雞蛋通常在商業加工處理過程已經清洗過。當母雞生蛋之後,工作人員會盡快清洗雞蛋,丟棄有裂紋的蛋,再用不會破壞表層膜的特別清潔劑為雞蛋表面進行消毒。所以市民買蛋的時候應光顧可靠的商戶。而高危人士食蛋應該要全熟,不應食半生熟蛋。

【心安食堂 • 蛋洗定唔洗?有明顯污跡先好洗!】

雞蛋🥚唔知洗唔洗好?等 #食安小隊 #CFSTeam 話你知啦!一般嚟講,蛋係唔駛洗嘅🙅🏻‍♀️。除非真係發現蛋殼俾禽鳥嘅糞便污染咗,就要用水清洗;洗完之後,仲要即刻將隻蛋煮熟呀🍳

點解一般情況下唔駛洗吓隻蛋先煮呢?因為整濕隻蛋可能會有利蛋殼上嘅微生物🦠滲入蛋內,而殘留喺蛋殼嘅水💧亦有機會令上面嘅細菌繼續生存。仲有,一旦清洗得唔妥當,亦可能會破壞雞蛋嘅表層膜,削弱保護功能👎🏻

其實,市面上出售嘅雞蛋通常喺商業加工處理過程已經清洗過。當母雞生蛋之後,工作人員會盡快清洗雞蛋,掉咗🗑有裂紋嘅蛋,再用唔會破壞表層膜嘅特別清潔劑為雞蛋表面進行消毒。所以,大家買蛋嘅時候,記得幫襯可靠嘅商戶🛒

給高危人士忠告:食蛋梗要熟,咪食半生熟!

食物安全中心facebook